Hər bir dövlətin müstəqilliyi və gücü təkcə onun iqtisadiyyatı ilə deyil, həm də vətəndaşlarının özünü nə dərəcədə təhlükəsiz hiss etməsi ilə ölçülür. Bu təhlükəsizliyin, daxili sabitliyin və qanunun aliliyinin əsas təminatçısı isə Azərbaycan Polisidir. Hər il iyulun 2-si ölkəmizdə daxili işlər orqanları əməkdaşlarının peşə bayramı — Polis Günü kimi qeyd olunur.

   Azərbaycan polisinin tarixi xalqımızın müstəqillik mübarizəsi ilə sıx bağlıdır. 1918-ci il iyulun 2-də Azərbaycan Xalq Cümhuriyyətinin Daxili İşlər Nazirliyi tərkibində ilk polis orqanları yaradıldı. Bu, gənc respublikanın daxili asayişini qorumaq üçün atılan ən mühüm addımlardan biri idi.

Sovet dönəmində də böyük inkişaf yolu keçən bu sistem, müstəqilliyimizin bərpasından sonra yeni mərhələyə qədəm qoydu. Ümummilli Lider Heydər Əliyevin 1998-ci ildə imzaladığı fərmanla iyulun 2-si rəsmi olaraq peşə bayramı günü kimi təsbit edildi. Bu addım polis əməkdaşlarının əməyinə verilən dövlət qiymətinin bariz nümunəsi oldu.

    Azərbaycan polisi yalnız şəhər və kəndlərimizdə asayişi qorumur, həm də vətənin bütövlüyü uğrunda canından keçməyə hazır olan hərbi qüvvədir. Birinci Qarabağ müharibəsində və 44 günlük Vətən müharibəsində Daxili İşlər Nazirliyinin şəxsi heyəti və Daxili Qoşunların hərbi qulluqçuları ön cəbhədə qəhrəmancasına döyüşüblər.

Bu gün işğaldan azad edilmiş Qarabağ və Şərqi Zəngəzurda Azərbaycan bayrağı altında xidmət aparan, o torpaqların təhlükəsizliyini təmin edən polislərimiz hər birimizin qürur mənbəyidir. Vətən uğrunda şəhid olan polis əməkdaşlarının xatirəsi isə qəlbimizdə əbədi yaşayacaqdır.

Müasir, Professional və Güvənilən

  Bu gün Azərbaycan polisi müasir texnologiyalarla təchiz olunmuş, beynəlxalq standartlara cavab verən bir struktur rütbəsinə yüksəlib. "Təhlükəsiz şəhər" sistemləri, operativ reaksiya xidmətləri və rəqəmsallaşma sayəsində cinayətkarlığa qarşı mübarizə daha effektiv aparılır.

Lakin polisin ən böyük gücü xalqın ona olan inamıdır. Gecə-gündüz, yağışda-garda, hər kəs evində rahat yatarkən küçələrdə keşiyimizi çəkən, köməyə ehtiyacımız olduqda ilk zəngimizlə gələn asayiş keşikçilərinə minnətdarıq.