Vətən uğrunda canından keçən igidlər heç vaxt unudulmur. Onlar qəlbimizdə bir əfsanəyə, bir qürur mənbəyinə çevrilirlər. Aydın Abdullayev də elə qəhrəmanlardan biridir – ürəyi Vətən sevgisi ilə döyünən, son damla qanına qədər torpaqlarımızın müdafiəsi üçün vuruşan bir igid.
1990-cı ildə Bakıda anadan olan Aydın, hələ uşaqlıq illərindən inadkarlığı, cəsarəti və prinsipiallığı ilə seçilirdi. İdmana böyük maraq göstərirdi, müxtəlif yarışlarda qalib olurdu.   Amma onun ən böyük arzusu – Vətənə xidmət etmək idi. Ali təhsil üçün İdman Akademiyasına sənədlərini versə də, taleyi onu daha müqəddəs bir yola yönəltdi – orduya! O, könüllü şəkildə Azərbaycan Silahlı Qüvvələrinin sıralarına qoşuldu və qısa müddətdə bacarığı, dözümlülüyü ilə seçilərək kəşfiyyatçı-snayper oldu.
 Snayper olmaq yalnız bir silahı mükəmməl idarə etmək deyil, bu, səbir, iti zəkə və polad iradə tələb edən bir peşədir. Aydın düşmənin ən qorxulu kabuslarından birinə çevrilmişdi. Onun məqsədi təkcə hədəfi vurmaq deyildi – o, torpaqlarımızın hər qarışını qorumağa and içmişdi.
Xidməti dövründə fədakarlığı və cəsarəti ilə seçildi. Hər dəfə tapşırığa gedərkən, sanki ölüm onun gözlərinə baxırdı, amma o, qorxmurdu. Çünki o bilirdi – Vətən yolunda canını fəda etmək, ən ali zirvəyə ucalmaqdır!
2013-cü il, oktyabrın 25-i... Tarix, yenə bir qəhrəmanın şəhadətə ucaldığı günü qeyd etdi. Tərtər rayonunda düşmən atəşkəsi pozdu və Aydın silahdaşları ilə birgə düşmənə qarşı döyüşə atıldı. Son nəfəsinə qədər vuruşdu, son gülləsinə qədər mübarizə apardı. O, öz canını verərək, torpağımızın müqəddəsliyini bir daha sübut etdi.


  Ölümündən sonra "Hərbi xidmətdə fərqlənməyə görə" 3-cü dərəcəli medalla təltif olundu. Amma ən böyük mükafat onun adı, onun şücaəti və xalqının qəlbində əbədi yaşamasıdır.
 Şəhid Aydın Abdullayev yalnız bir ad deyil. O, Vətənə sevginin, fədakarlığın və şücaətin simvoludur. Onun yolu gənclərə nümunə, xatirəsi isə hər zaman uca olacaq.
  Bu gün Aydının qisası alınıb! Qarabağ artıq azaddır! Azərbaycan Ordusu onun və digər şəhidlərimizin qanını yerdə qoymadı! Qarabağ Azərbaycandır!
  Qəhrəmanlar unudulmur! Ruhun şad olsun, igid!

       Afət İlkin