Sumqayıt şəhər İcra Hakimiyyətinin başçısı Zakir Fərəcovun növbəti səyyar qəbulu 2-ci məhəllədə keçirilib.
Bu barədə APA-ya İcra Hakimiyyətindən bildirilib.
   Qəbulda şəhər İcra Hakimiyyətinin məsul şəxsləri, idarə, müəssisə, təşkilatların rəhbərləri, şəhid ailələri, qazilər və şəhər sakinləri iştirak edib.
11 nömrəli məktəbin binasında baş tutan görüşdə şəhər sakinləri problem və şikayətlərini şəhər rəhbərinə çatdırıblar.
  Sakinləri fərdi qaydada dinləyən Sumqayıt Şəhər İcra Hakimiyyətinin başçısı Zakir Fərəcov qaldırılan məsələlərin bir qismini yerindəcə həll edib, araşdırılmasına ehtiyac olan bir sıra məsələlərin isə qanunvericiliyə uyğun, operativ həlli üçün müvafiq qurumların rəhbərlərinə tapşırıqlar verib.
Səyyar qəbulda iştirak edən sakinlər Sumqayıt şəhərində son illər ərzində görülən işlərdən məmnun olduqlarını, küçə və parkların abadlaşdırılması, yeni sosial infrastruktur obyektlərinin istifadəyə verilməsinin onların həyatına müsbət təsir etdiyini ifadə ediblər.
  Qeyd edilib ki, Sumqayıt şəhər İcra Hakimiyyətinin başçısı Zakir Fərəcov tərəfindən səyyar qəbullar hər həftə davam etdirilir.