Bu gündən Azərbaycanda qadınların pensiyaya çıxma yaş həddi artırılıb.
Sedanews.az Milli.az-a istinadən xəbər verir ki, 2026-cı il iyulun 1-dən etibarən qadınların pensiya yaşı 6 ay artırılaraq 65 ilə çatdırılıb.
   Belə ki, "Əmək pensiyaları haqqında" Qanuna əsasən, qadınların pensiyaya çıxma yaş həddi 2017-ci il iyulun 1-dən 2027-ci il iyulun 1-dək, kişilərin yaş həddi isə 2017-ci il iyulun 1-dən 2021-ci il iyulun 1-dək hər il 6 ay artırılaraq aşağıdakı qaydada müəyyənləşdirilir:

Dövr	Kişilər üzrə pensiya yaşı	Qadınlar üzrə pensiya yaşı
1 iyul 2017 - 30 iyun 2018	63 il 6 ay	60 il 6 ay
1 iyul 2018 - 30 iyun 2019	64 il	61 il
1 iyul 2019 - 30 iyun 2020	64 il 6 ay	61 il 6 ay
1 iyul 2020 - 30 iyun 2021	65 il	62 il
1 iyul 2021 - 30 iyun 2022	65 il	62 il 6 ay
1 iyul 2022 - 30 iyun 2023	65 il	63 il
1 iyul 2023 - 30 iyun 2024	65 il	63 il 6 ay
1 iyul 2024 - 30 iyun 2025	65 il	64 il
1 iyul 2025 - 30 iyun 2026	65 il	64 il 6 ay
1 iyul 2026 və sonra	65 il	65 il

   Həmin qanuna görə, pensiya yaşına çatmış şəxsin fərdi hesabın sığorta hissəsində qeydə alınmış pensiya kapitalı əmək pensiyasının minimum məbləğindən az olmayan pensiya təminatına imkan verdikdə sığorta stajından asılı olmayaraq, bu pensiya təminatına imkan vermədikdə isə azı 25 il sığorta stajı olduqda (2017-ci il iyulun 1-dək yaşa görə əmək pensiyası təyin edilmiş şəxslər istisna olmaqla) yaşa görə əmək pensiyası hüququ var.
   Əmək pensiyası yaş həddinə çatmış, lakin yaşa görə əmək pensiyası hüququ yaranmayan şəxslərə "Sosial müavinətlər haqqında" Qanuna əsasən, əmək qabiliyyəti olmayan şəxslər işləmədikdə yaşa görə sosial müavinət (2023-ci ilin yanvarın 1-dən 220 manat) almaq hüququ var.

---

---