Həftəsonları işə çıxan virus,  polislə qaçdı-tutdu, mədəniyyətsiz “təşəkkür”... 

Koronavirusa görə həftəsonları tətbiq olunan küçəyə çıxma qadağası iki gündür ki, sosial şəbəkələrdə müzakirə olunur. Qərarın qəbulunu yersiz hesab edənlər də var, bunun vacibliyini vurğulayanlar da.
Həftəsonları karantin rejiminin tətbiqini mənasız hesab edənlər bunu virusun şənbə-bazar günləri istirahətə çıxması ilə əlaqələndirib, bununla bağlı caps-lar hazırlayıb, Operativ Qərargahın qərarını ələ salmağa çalışırlar. Bu da, ilk növbədə, virusa qarşı inamsızlıqdan irəli gəlir. Lakin onlar bu qadağanın məqsədinin insanların yaxın təmasını heç olmasa ikigünlük azaltmaq olduğunu anlamaq istəmirlər.
Uzun müddət karantin rejimində qalmaq mümkün deyil. Beynəlxalq təcrübə də göstərir ki, bu qədər vaxt karantin rejiminin tətbiqi təkcə iqtisadi itkilərə deyil, həm də insanların psixologiyasının pozulmasına səbəb olur. Bunu nəzərə alaraq karantin rejiminin, sadəcə, şənbə bazar günlərində tətbiqi həm iqtisadiyyatımıza, həm də koronavirusa yoluxma sayına müsbət təsirini göstərə bilər.

Sosial şəbəkələrdə yayılan videolara baxsaq, görərik ki, Bakı şəhərinin mərkəz ərazilərində yaşayan sakinlər karantin qaydalarına əməl etsələr də, şəhərətrafı ərazilərdəki sakinlər bu qaydalara məhəl qoymadan küçəyə çıxıblar. Bəziləri polislə qaçdı-tutdu, gizlənqaç, bəziləri futbol, bəziləri də damda domino oynayıb. Hətta çardaqda kabab çəkənlər belə olub. Sözsüz ki, sadalanan şəxslərin əksəriyyəti polis əməkdaşları tərəfindən cərimələniblər. Məsələn, DİN-in ikigünlük statistikasına əsasən 2776 nəfər karantin qaydalarını pozduğuna görə cəzalandırılıb.

Amma bununla belə, polis nəzarətinin zəif olduğu ərazilərdə karantin qaydalarını pozmalarına baxmayaraq cərimələnməyən şəxslər olub. Onlar bunu fəxrmiş kimi lentə alıb, sosial şəbəkədə paylaşıb, qürrələniblər. Hətta karantin qaydalarını pozub, saxlanılmasına etiraz məqsədilə polisə bıçaqla müqavimət göstərənlər də olub.
Sözsüz ki, koronavirus hər kəsin həyatının altını üstünə çevirib. Amma ən çox zərbə həkimlərə və polislərə dəyib. Onlar son aylar fasiləsiz işləyib, bizim qulluğumuzda dayanıblar. Ailə üzvləri ilə normal vaxt keçirə bilməyən polis və həkimlər günboyu qoruyucu vasitələrdən istifadə edərək xidmət aparıb, bu bəlanın üstümüzdən tez çəkilməsi üçün çalışırlar.
 
Polisə, qaydalara tabe olmamağı müsbət halmış kimi təbliğ edənlər, səs-siqnalı eşidən kimi qaçmağa yer axtaranlar, polis görən kimi dabanına tüpürüb qaçanlar sosial şəbəkədə iki gün ərzində yayılan videoların əsas predmeti idi. Lakin sosial şəbəkələrdə ən çox diqqətimi çəkən video polis əməkdaşlarının karantin qaydalarını pozan şəxsi saxlayarkən bina sakinlərinin yuxarıdan zibil atması oldu. Video zibil atmağa düşən şəxsin buna görə 4 nəfər tərəfindən saxlanılması kimi təqdim olunsa da, avtomobildən və saxlanılan şəxsin yarıçılpaq olmasından məsələnin deyildiyi kimi olmaması aydın görünür. Videoya reaksiya iki yöndə idi. Bir qisim insan saxlanılan şəxsin tərəfini tuturdu, digərləri isə polisin. Polisə qarşı kini olan şəxslər bu videonu əsas gətirərək polislə sadə vətəndaşların arasına yenidən nifaq salmağa çalışırdılar.
Operativ Qərargahın brifinqində dəfələrlə bildirilib ki, qaydalara nə qədər çox əməl etsək, karantindən o qədər tez çıxacağıq. Bu qaydaların uzanmasına səbəb olan vətəndaşların cəzalandırılmasına görə polisə zibil atmaqdansa, bizim evdə dincəldiyimiz zaman, 31 dərəcə istidə, koronavirusun tüğyan etdiyi ərəfədə xidmət göstərən polisə təşəkkür etmək lazım idi.
Eyvandan zibil atmaq mədəniyyət deyil, polisin üstünə atmaq isə, ümumiyyətlə, qəbulolunmazdır.
Bəxtiyar Umarlı
 Milli.Az