Sakinlər yol, səki, yağış suları və abadlıq problemlərindən narazıdır. Bələdiyyə sədrinin açıqlamaları isə yeni suallar doğurur
Suraxanı rayonunun Hövsan qəsəbəsində sakinlərin çoxsaylı şikayətləri ilə bağlı əraziyə baş çəkdik. Məqsəd sakinlərin səsləndirdiyi problemləri yerində görmək və Hövsan bələdiyyəsinin mövqeyini öyrənmək idi.
Əraziyə baxış zamanı bəzi küçə və məhəllədaxili yollarda abadlıq problemlərinin, yarımçıq səki işlərinin, yol kənarında tikinti materiallarının və tullantıların, torpaq və baxımsız sahələrin olduğu müşahidə edildi.
Sakinlərin sözlərinə görə, xüsusilə yağışlı havalarda vəziyyət daha da ağırlaşır. Küçələrdə gölməçələr yaranır, bəzi yerlərdə piyadaların hərəkəti çətinləşir. Valideynlər isə uşaqların məktəbə gedib-gəlməsində çətinlik çəkdiklərini bildirirlər.
Sakinlərdən ən çox eşitdiyimiz suallardan biri isə belə oldu:
“Biz Hövsan bələdiyyəsini tanımırıq. Kim seçilib, nə iş görür, hansı problemlərlə məşğul olur – bunlardan xəbərimiz yoxdur.”
Təbii ki, bu iddiaların cavabını bələdiyyə rəhbərliyindən almaq lazımdır. Çünki yerli özünüidarəetmənin əsas məqsədlərindən biri vətəndaşların yerli problemlərinin həllinə xidmət etməkdir.
Ərazidə çəkdiyimiz görüntülərdə bir sıra yerlərdə səki daşlarının yenicə düzülməyə başladığı, lakin işlərin tam başa çatdırılmadığı görünür.
Başqa ərazilərdə isə piyadaların hərəkəti üçün nəzərdə tutulan sahələr torpaq, daş və müxtəlif tullantılarla doludur.
Bəzi yerlərdə ağacların ətrafının baxımsız vəziyyətdə olduğu, yol kənarlarında isə məişət tullantılarının toplandığı müşahidə olunur.
Sual yaranır:
Abadlıq işləri hansı layihə əsasında aparılır və bu işlərin başa çatdırılması üçün konkret müddət müəyyən edilibmi?
Əraziyə baxışımız zamanı daha bir narazılığın şahidi olduq.
Şəhid ailəsinin üzvü olduğunu bildirən sakin bələdiyyə tərəfindən yol kənarına daş və tikinti materiallarının töküldüyünü, nəticədə evinin giriş-çıxışının çətinləşdiyini bildirdi.
Sakin iddia etdi ki, materiallar onun evinin qarşısına yığılıb və avtomobili ilə həyətinə daxil olmaqda çətinlik çəkir.
Burada da sual yaranır:
Əgər yol və abadlıq işləri aparılırsa, nə üçün sakinlərin, xüsusilə şəhid ailəsinin evinə giriş-çıxışı əvvəlcədən təmin edilməyib?
Yol hansı vəsait hesabına çəkilib?
Araşdırma zamanı Hövsan bələdiyyəsinin sədri Seymur Rəsulovla da görüşdük və çəkilən yollar barədə suallarımızı ünvanladıq.
Sədr əvvəlcə bildirdi ki, sözügedən yol bələdiyyənin büdcəsi hesabına çəkilib.
Daha sonra isə yolun bələdiyyə ilə bir şirkətin birlikdə fəaliyyəti nəticəsində çəkildiyini söylədi.
Lakin həmin şirkətin adı açıqlanmadı.
Məhz burada yeni suallar meydana çıxır:
Əgər yol bələdiyyənin büdcəsi hesabına çəkilibsə, şirkətin bu işdə rolu nə olub?
Əgər yol şirkətlə birlikdə çəkilibsə, həmin şirkət hansı şirkətdir?
Bələdiyyə ilə həmin şirkət arasında müqavilə bağlanıbmı?
Yolun çəkilişinə ümumilikdə nə qədər vəsait xərclənib?
Bələdiyyə büdcəsindən bu iş üçün nə qədər pul ayrılıb?
Şirkət tərəfindən hansı məbləğdə və ya hansı formada maliyyə və texniki dəstək göstərilib?
Yolun görülən işlər üzrə qəbul-təhvil sənədləri varmı?
İşin keyfiyyətinə kim nəzarət edib?
Bütün bu sualların cavabı ictimaiyyət üçün əhəmiyyətlidir. Çünki söhbət yerli özünüidarəetmə qurumunun fəaliyyəti və bələdiyyə büdcəsindən gedir.
Bələdiyyə sədrinin qəbulunda olarkən sakinlərin problemləri ilə bağlı konkret suallar ünvanladıq. Lakin suallarımıza ətraflı və sənədlərlə əsaslandırılmış cavablar almaq mümkün olmadı.
Görüş zamanı səhər saatlarında bələdiyyə sədrinin çay və şirniyyat qəbul etdiyini də müşahidə etdik. Bu məqamı zarafatla soruşduqda isə sədr səhər şirniyyat yemədən işləyə bilmədiyini bildirdi.
Təbii ki, rəhbərin çay içməsi və şirniyyat yeməsi onun şəxsi məsələsidir. Amma jurnalistin və vətəndaşın qarşısında əsas məsələ başqa idi:
Sakinlərin problemlərinə niyə konkret cavab verilmir?
Əvvəlki tənqidi materiallar da diqqətdən kənarda qalmamalıdır
Seymur Rəsulovun fəaliyyəti ilə bağlı ötən il mediada tənqidi materialların yayımlandığı da bildirilir. Həmin materiallarda Hövsan ərazisində yaşıllıqlar və ağaclarla bağlı məsələlər gündəmə gətirilib.
Əldə etdiyimiz məlumata görə, bu məsələ ilə bağlı materialların Baş Prokurorluğa təqdim edildiyi də bildirilib.
Lakin burada xüsusi olaraq qeyd edirik: hər hansı şəxsin hüquqi məsuliyyəti barədə qərar yalnız səlahiyyətli dövlət orqanının araşdırması və hüquqi qiymətləndirməsi əsasında müəyyən edilə bilər.
Bizim məqsədimiz kimisə əvvəlcədən ittiham etmək deyil.
Əksinə, məqsəd ictimai maraq doğuran məsələlərə aydınlıq gətirmək, sakinlərin səsləndirdiyi problemləri işıqlandırmaq və aidiyyəti qurumlardan cavab almaqdır.
Hövsan bələdiyyəsinə 10 konkret sual
1. Son bir il ərzində Hövsanda neçə küçə və məhəllədaxili yol təmir olunub?
2. Bu işlərə nə qədər vəsait xərclənib?
3. Sözügedən yolun çəkilişi bələdiyyənin büdcəsi hesabına aparılıb, yoxsa şirkətlə birgə həyata keçirilib?
4. Şirkətlə birgə aparılıbsa, həmin şirkətin adı və bələdiyyə ilə müqavilənin şərtləri niyə açıqlanmır?
5. Yolun çəkilişi ilə bağlı tender, müqavilə, smeta və qəbul-təhvil sənədləri varmı?
6. Yağışlı havalarda Hövsanda yaranan gölməçələrin və su basmalarının qarşısının alınması üçün hansı tədbirlər görülüb?
7. Yarımçıq qalmış səki və abadlıq işləri nə vaxt başa çatdırılacaq?
8. Sakinlərin, xüsusilə şəhid ailələrinin müraciətləri bələdiyyədə necə qeydiyyata alınır və onların həlli necə təmin edilir?
9. Bələdiyyə büdcəsinin gəlir və xərcləri barədə sakinlərə hansı formada məlumat verilir?
10. Hövsan sakinlərinin “bələdiyyənin fəaliyyətindən xəbərimiz yoxdur” şikayətinə sədrin cavabı nədir?
Hövsanda çəkdiyimiz görüntülər və sakinlərin söylədikləri göstərir ki, qəsəbədə həllini gözləyən problemlər var.
Bu problemlərin nə qədərinin bələdiyyənin, nə qədərinin isə digər aidiyyəti qurumların səlahiyyətində olduğunu da ayrıca araşdırmaq lazımdır.
Amma bir məsələ dəyişməz olaraq qalır:
Vətəndaş öz yaşadığı ərazidə yol, səki, abadlıq və təhlükəsizlik problemi ilə üzləşirsə, onun müraciətinə cavab verilməli, görülən işlər və xərclənən vəsait barədə ictimaiyyətə aydın məlumat verilməlidir.
Biz Hövsan bələdiyyəsinin və sədr Seymur Rəsulovun bu yazıda səsləndirilən suallara konkret, sənədlərlə əsaslandırılmış cavablarını dərc etməyə hazırıq.
Çünki əsas sual hələ də ortadadır:
Hövsan bələdiyyəsi sakin üçün nə edir və bələdiyyə büdcəsi hara xərclənir?
Afət Məmmədova 
Sedanews.az