Azərbaycanın müasir hərb tarixinə adını qızıl hərflərlə yazdırmış, Birinci Qarabağ müharibəsinin əfsanəvi komandirlərindən biri, Azərbaycanın Milli Qəhrəmanı Asif Məhərrəmov (Fred Asif) öz cəsarəti, vətənpərvərliyi və sərkərdəlik məharəti ilə xalqımızın qəlbində əbədi yuva qurmuş bir şəxsiyyətdir. İyulun 1-i onun fiziki olaraq aramızı tərk etdiyi, lakin mənəvi olaraq ölümsüzlüyə qovuşduğu anım günüdür.  

   Asif Məhərrəmov 26 iyul 1952-ci ildə Ağdam şəhərində anadan olub. Gənclik illərindən etibarən haqsızlığa dözümsüzlüyü, cəsarəti və təşkilatçılıq qabiliyyəti ilə həmyaşıdlarından seçilirdi. "Fred" ləqəbini ona hələ gənc yaşlarında, xarici filmlərin birindəki müsbət və mərd qəhrəmana bənzətdikləri üçün dostları vermişdi. Bu ad sonradan döyüş meydanında düşmənə vahimə, doğma xalqına isə güvən bəxş edən bir simvola çevrildi.  

   1991-ci ildə Qarabağda vəziyyət gərginləşəndə Asif Məhərrəmov bir an belə tərəddüd etmədən Vətənin müdafiəsinə qalxdı. O, könüllülərdən ibarət ilk özünümüdafiə batalyonlarından birini – məşhur 859 saylı Ağdam ərazi özünümüdafiə batalyonunu yaratdı və ona komandirlik etdi.

  Onun döyüş yolu strateji əhəmiyyətli əməliyyatlarla zəngindir: Asif Məhərrəmovun rəhbərliyi altında erməni işğalçılarının Ağdam istiqamətindəki mühüm mövqeləri darmadağın edildi və bu kəndlər düşməndən təmizləndi.

 Gülablı, Şelli, Qorğan kəndləri uğrunda gedən döyüşlərdə şəxsi şücaət göstərərək düşmənin xeyli canlı qüvvəsini və texnikasını məhv etdi.

Xocalı soyqırımı zamanı mühasirədən çıxa bilən dinc sakinlərin təhlükəsiz dəhliz vasitəsilə Ağdama gətirilməsində və xilas edilməsində "Fred Asif"in və onun rəhbərlik etdiyi batalyonun misilsiz xidmətləri olmuşdur.

  Döyüşlərin birində ağır yaralanmasına baxmayaraq, o, müalicəsini tam bitirmədən yenidən cəbhəyə, əsgərlərinin yanına qayıtmışdı. Bu fədakarlıq onun vətənə olan sevgisinin ən bariz nümunəsi idi.   

   Asif Məhərrəmovun göstərdiyi rəşadət dövlətimiz tərəfindən yüksək qiymətləndirilmişdir.

  Azərbaycan Respublikası Prezidentinin 7 dekabr 1992-ci il tarixli fərmanı ilə baş leytenant Asif Mustafa oğlu Məhərrəmova "Azərbaycanın Milli Qəhrəmanı" adı verilmişdir.

   Bakı şəhərində və Ağdamda onun adınına kücələr verilmişdi.