Vətən torpaqlarının azadlığı uğrunda canından keçən qəhrəmanlarımız Azərbaycanın şanlı tarixini öz qanları ilə yazan unudulmaz simalardır. İyulun 25-i həm Mayor Elnur Quliyevin, həm də Baş leytenant Orxan Hüseynovun mövlud günüdür. Doğulduqları gündən şəhadət zirvəsinə qədər olan şərəfli ömür yolu hər bir azərbaycanlı üçün qürur mənbəyidir.

    Mayor Elnur Ədalət oğlu Quliyev 25 iyul 1984-cü ildə Füzuli şəhərində anadan olub. Uşaqlıq illərindən torpaq həsrəti və vətənpərvərlik ruhu ilə böyüyən Elnur ömrünü hərbi xidmətə və Vətənin müdafiəsinə həsr etmişdir. Azərbaycan Silahlı Qüvvələrinin təcrübəli və peşəkar zabiti kimi nümunəvi xidmət yolu keçmiş, zabit şərəfini hər zaman uca tutmuşdur.

   2020-ci il sentyabrın 27-də başlayan Vətən müharibəsində Mayor Elnur Quliyev cəbhənin müxtəlif istiqamətlərində gedən ağır döyüşlərdə şəxsi heyətə komandirlik edərək böyük şücaət göstərmişdir. Doğma torpağı olan Füzulinin və digər ərazilərimizin düşmən işğalından azad edilməsi uğrunda mərdliklə döyüşmüşdür. O, 2 oktyabr 2020-ci il tarixində Füzuli-Cəbrayıl istiqamətində gedən şiddətli döyüşlər zamanı qəhrəmancasına şəhid olmuşdur.

  Azərbaycan Respublikasının ərazi bütövlüyünün təmin edilməsi uğrunda döyüş əməliyyatlarında xüsusi xidmətlərinə və göstərdiyi igidliyə görə Mayor Elnur Quliyev ölümündən sonra dövlətimiz tərəfindən yüksək orden və medallarla təltif edilmişdir: "3-cü dərəcəli Vətənə xidmətə görə" ordeni, "Vətən uğrunda" medalı, "Füzulinin azad olunmasına görə" medalı, "Cəbrayılın azad olunmasına görə" medalı,"Xocavəndin azad olunmasına görə" medalı.

  Baş leytenant Orxan Ələkbər oğlu Hüseynov Bərdə rayonunun Güloğlular kəndində 25 iyul 1990-cı ildə anadan olmuşdur.  Geniş dünyagörüşünə və yüksək hərbi hazırlığa malik olan Orxan gənc yaşlarından Azərbaycan Silahlı Qüvvələrinin cəsur zabitləri sırasına qoşulmuşdur. Xidmət etdiyi müddətdə öz intizamı, peşəkarlığı və yoldaşlarına olan diqqəti ilə fərqlənmişdir.

  Vətən müharibəsi başlayandan cəbhənin ön xəttində döyüşə qatılan Baş leytenant Orxan Hüseynov düşmənin canlı qüvvəsinin və texnikasının məhv edilməsində böyük şücaət göstərmişdir. Zabit kimi üzərinə düşən tapşırıqları dəqiqliklə yerinə yetirərək döyüş meydanında cəsarət nümunəsi olmuş, Füzuli və Xocavənd istiqamətində gedən döyüşlərdə qəhrəmancasına şəhadətə qovuşmuşdur. 

   Azərbaycan Respublikasının ərazi bütövlüyünün bərpa olunması zamanı döyüş tapşırıqlarını rəşadətlə yerinə yetirdiyinə və igidlik göstərdiyinə görə Baş leytenant Orxan Hüseynov ölümündən sonra müvafiq orden və medallarla təltif olunmuşdur: "Vətən uğrunda" medalı, "Döyüşdə fərqlənməyə görə" medalı,"Füzulinin azad olunmasına görə" medalı, "Xocavəndin azad olunmasına görə" medalı.Əbədi Ehtiram:

  İyulun 25-i doğum günləri olan bu iki igid qəhrəmanımızın və onların timsalında bütün Şəhidlərimizin azadlıq uğrunda göstərdikləri fədakarlıq xalqımızın qəlbində əbədi yaşayacaqdır. 

    Allah bütün Şəhidlərimizə rəhmət eləsin!