27 oktyabr Vətən müharibəsi şəhidi, əsgər Musayev Niyaməddin Zirəddin oğlunun şəhadətə ucaldığı gündür. 23 yaşında ömrünü Vətənə qurban verən bu igid Azərbaycan əsgərinin arzuları yarımçıq qalsa da, adı və qəhrəmanlığı xalqımızın yaddaşında əbədi yaşayacaq.
   Vətən sevgisi bəzən bir insanın bütün həyat yolunu müəyyənləşdirir. Elə insanlar var ki, onların ömrü illərlə ölçülmür. Onlar qısa ömürlərinə böyük mənalar sığdırır, öz fədakarlıqları ilə tarix yazırlar. Niyaməddin Musayev də Vətən torpaqlarının azadlığı uğrunda canından keçərək xalqımızın qürur mənbəyinə çevrilən qəhrəmanlarımızdandır.
   Niyaməddin Zirəddin oğlu Musayev 10 mart 1997-ci ildə Şəmkir rayonunun Mahmudlu kəndində dünyaya göz açıb. O, 2003-cü ildə Yaşar Əsgərov adına Koltəhnəli kənd tam orta məktəbinin birinci sinfinə gedib, 2014-cü ildə həmin məktəbin on birinci sinfini bitirib.
   Gənc yaşlarından zəhmətə alışan Niyaməddin avtomobil təmirini öyrənmiş, hərbi xidmətdən sonra bu sahədə çalışaraq öz halal zəhməti ilə həyatını qurmağa başlamışdı. Peşəsinə bələd olan, əlinin zəhməti ilə qazanan gəncin gələcəklə bağlı arzuları, qurmaq istədiyi həyatı vardı.
   2015-ci ildə həqiqi hərbi xidmətə çağırılan Niyaməddin Naxçıvan Muxtar Respublikasında yerləşən hərbi hissələrdən birində xidmət edib. 2016-cı ildə hərbi xidmətdən tərxis olunaraq mülki həyata qayıdıb. Lakin Vətən torpaqlarının işğal altında qalması onu daim düşündürən məsələlərdən biri idi.
   2020-ci il sentyabrın 27-də başlayan Vətən müharibəsi Azərbaycanın tarixində yeni bir qəhrəmanlıq səhifəsi açdı. Torpaqlarımızın azadlığı uğrunda mübarizəyə qoşulan minlərlə Azərbaycan oğlu kimi Niyaməddin də Vətən qarşısında borcunu yerinə yetirmək üçün ordu sıralarına qayıtdı.
   O, 2020-ci il sentyabrın 21-də səfərbərlik çərçivəsində hərbi xidmətə çağırılmışdı. Müharibə başlayanda Niyaməddin artıq özünü Vətənin müdafiəsinə həsr etməyə hazır olan bir əsgər idi.
   Niyaməddin Musayev döyüşlərdə Murovdağ, Hadrut və Füzuli istiqamətlərində iştirak edib. Döyüş yoldaşlarının xatirələrindən bəlli olur ki, o, təkcə cəsur əsgər deyil, həm də yoldaşlarına kömək etməyə çalışan, zəhmətkeş və səmimi insan olub. Avtomobil təmiri sahəsindəki bacarığı hərbi xidmətdə də işinə yarayırdı. O, əsgər yoldaşlarının avtomobillərini döyüşə hazırlamağa kömək edir, öz biliyini və bacarığını ümumi işə sərf edirdi.
   Niyaməddinin Vətən sevgisi sözlərində də, davranışlarında da özünü göstərirdi. O, torpaqlarımızın işğaldan azad olunacağına inanır, qələbə gününü görməyi arzulayırdı.
  “Qələbədən sonra görüşərik...”
 Niyaməddinin döyüş yolu ilə bağlı yayımlanan xatirələrdə onun döyüş yoldaşları ilə qələbədən sonra yenidən görüşmək barədə danışdığı bildirilir. Bir-birinə dayaq olan, eyni səngərdə Vətənin azadlığı uğrunda mübarizə aparan əsgərlər qələbədən sonra görüşüb doyunca söhbətləşməyi arzulayırdılar.
   Lakin müharibənin amansız üzü bu arzuların hamısının gerçəkləşməsinə imkan vermədi.
  Niyaməddin Musayev 2020-ci il oktyabrın 27-də Füzuli istiqamətində gedən döyüşlərdə şəhidlik zirvəsinə ucaldı. Onun Vətənə qovuşan ömrü 23 yaşında başa çatdı. Doğulduğu Şəmkir rayonunun Mahmudlu kəndində dəfn edilən qəhrəmanımızın məzarı bu gün onun xatirəsini yaşadan müqəddəs ünvanlardan biridir.
   Niyaməddinin qələbədən sonra döyüş yoldaşları ilə görüşmək arzusu yarımçıq qaldı. Ancaq o, Vətən uğrunda canından keçən silahdaşlarının, xalqımızın və gələcək nəsillərin yaddaşında yaşayacaq. 
      Azərbaycan dövləti Niyaməddin Musayevin Vətən qarşısındakı xidmətlərini yüksək qiymətləndirib. Azərbaycan Respublikasının Prezidenti İlham Əliyevin müvafiq sərəncamları ilə şəhidimiz ölümündən sonra üç medalla təltif olunub:
“Vətən uğrunda” medalı – 15 dekabr 2020-ci il tarixli sərəncamla;
“Döyüşdə fərqlənməyə görə” medalı – 18 dekabr 2020-ci il tarixli sərəncamla;
“Füzulinin azad olunmasına görə” medalı – 25 dekabr 2020-ci il tarixli sərəncamla.
  Bu təltiflər Niyaməddin Musayevin Azərbaycanın ərazi bütövlüyünün bərpası uğrunda göstərdiyi xidmətlərin, döyüş tapşırıqlarının icrasında nümayiş etdirdiyi cəsarət və fədakarlığın dövlət səviyyəsində qiymətləndirilməsid
Unudulmayan qəhrəman
  Şəhidlərimizin həyat hekayələri yalnız keçmişin xatirəsi deyil. Onlar həm də gələcək nəsillərə Vətən sevgisi, sədaqət, mərdlik və fədakarlıq haqqında verilən ən böyük dərslərdir.
  Niyaməddin Musayevin ömür yolu da belə bir nümunədir. O, doğulduğu kəndin, ailəsinin və bütün Azərbaycan xalqının qüruruna çevrildi. Gənc yaşında həyatla vidalaşsa da, Vətən naminə etdiyi seçim onu əbədiyyətə qovuşdurdu.
  Bu gün Niyaməddinin adı çəkiləndə gözlər önündə yalnız bir şəhidin deyil, öz arzularını Vətənin azadlığına qurban verən gənc bir insanın obrazı canlanır. Onun kimi qəhrəmanların sayəsində torpaqlarımızın azadlığı, xalqımızın qələbə sevinci və dövlətimizin ərazi bütövlüyü tariximizə yazıldı.
  Qələbədən sonra görüşmək arzusu yarımçıq qaldı, amma Niyaməddinin adı qələbə tariximizin ayrılmaz hissəsinə çevrildi.
  Allah şəhidimiz Niyaməddin Musayevə və bütün Vətən övladlarına rəhmət eləsin. Ruhları şad, məkanları cənnət olsun!

     Sevinc Salehqızı