Sosial şəbəkədən daha bir təxribat. Şəhid anasının döyülməsi yalanı ayaq tutdu, yerimədi

  Sosial şəbəkə növbəti dəfə ictimai rəyi yayındıranların alətinə çevrildi. Bu dəfə Yeni İctimai Nəzarət Şurası adlı qurum öz feysbuk səhifəsində Daşkəsən rayon sakini, şəhid anası Sevda Şıxıyevanın guya döyülməsi ilə bağlı böhtan yaydı. Beləliklə tamamilə fəaliyyəti olmayan "Tale" adlı ictimai birliyin tərkibində yaradılmış və rəsmi dövlət qeydiyyatı olmayan Şuranın şantaj xarakterli paylaşımı gündəmə gəldi. Bununla belə qısa zamanda məlum oldu ki, Sevda Şıxıyevanın Lalə Cəfərova tərəfindən döyülməsi ilə bağlı videolar tamamilə yalan və şantaj xarakterlidir. Tibbi ekspertizadan sonra şəhid anasının döyülmədiyi tam olaraq təsdiqlənib. Təqdim olunanların əksinə dekabrın 17-də, saat 17 radələrində Sevda Şıxıyeva, əri Raqif Şıxıyev, oğlu Sərxan Şıxıyev, bacısı oğlu Asif Məmmədov və yaxınları Dəstəfur kənd inzibati ərazi dairəsi üzrə nümayəndəliyin inzibati binasına küt alətlərlə basqın ediblər. Bu zaman vəzifə səlahiyyətlərini icra edən Lalə Cəfərovanı xidməti otağında döyərək ona ağır bədən və kəllə-beyin xəsarətləri yetiriblər. Məlum hücumun səbəblərini hazırda Gəncə şəhər Abbas Səhhət adına xəstəxananın travmatologiya şöbəsində müalicə alan Lalə Cəfərovadan eşidək.


Şəhid anası Sevda Şıxıyeva və yaxınlarının yeganə qurbanı Lalə Cəfərova olmayıb. Əlbir olan qohumlar huşsuz vəziyyətdə yerə uzanmış Lalə Cəfərovanı kəndirlə avtomobilə bağlayıb sürümək istəyiblər. Bu vaxt Lalə Cəfərovanın köməyinə gələn bacısı Pərvanə Cəfərova da Şıxıyevlərin hücumuna məruz qalıb. Köməyə gələn Dəstəfur kənd sakini Daşqın Cəfərov isə başından aldığı zərbədən sonra sol gözünün nurunu itirib.

Araşdırmalar zamanı məlum olub ki, Şıxıyevlərin qisas hissinin kökündə ədavət dayanır. Belə ki, Lalə Cəfərovanın qayınatası mərhum Səməndər Həsənov vaxtilə Dəstəfur kənd icra nümayəndəsi işləyərkən, Sevda Şıxıyevanın dövlətə qarşı cinayətdə təqsirləndirilən bacısı oğlu Asif Məmmədov həbs edilərək 13 il azadlıqdan məhrum edilib. Elə həmin vaxtdan Sevda Şıxıyeva və onun qohumları düşmənçilik üçün fürsət axtarıblar. Sevda Şıxıyeva şəhid anası statusu alandan sonra, bacısı oğlu Asif Məmmədovla birgə Lalə Cəfərovanı işdən çıxmağa məcbur edib. Məqsəd isə Cəfərovanın yerinə öz namizədlərini təyin etdirmək olub. Bunu Daşkəsən İcra hakimiyyətinin ictimai siyasi və humanitar məsələlər şöbəsinin müdir müavini, Elmar Əliyev də təsdiqləyib. Elmar Əliyevin sözlərinə görə bu günədək şəhid ailəsi kimi Şıxıyevlər üçün imkanlar çərçivəsində köməkliklər göstərilib. Şəhidin atası və qardaşı, bacısı müvafiq işlərlə təmin olunub.
Qeyd edək ki, sözügedən məsələ Daşkəsən rayon hüquq-mühafizə orqanlarında nəzarətə götürülməklə hüquqi qiymət verilməsi üçün araşdırılır.
REAL

---

---