Bildiyimiz kimi 04 may 2022-ci il tarixində cənab Prezident İlham Əliyevin fərmanı ilə Vahid Hacıyev Şərqi Zəngəzur iqtisadi rayonuna daxil olan Zəngilan rayonunda Prezidentin Xüsusi Nümayəndəsi təyin olunmuşdur. Bu fərman imzalanmazdan öncə möhtərəm Prezidentimiz Vahid Hacıyevi video-formatda qəbul etmişdir. Sözsüz ki, istər keçən il Şərqi Zəngəzur iqtisadi zonasının yaranması, istərsə də Prezidentin xüsusi nümayəndəsinin təyin olunması cəmiyyətdə müsbət mənada sevinclə qarşılanmışdır. Azərbaycan Respublikasının Prezidenti, Ali Baş Komandan İlham Əliyevin məqsədyönlü siyasəti və məharətli sərkərdəlik qabiliyyəti nəticəsində Vətən müharibəsində - Qarabağ savaşında qazanılmış tarixi Zəfər ölkəmizin çoxəsrlik tarixinin nadir hadisəsidir. Cəmi 44 gün ərzində Azərbaycan Ordusu təcavüzkar Ermənistanın 30 illik işğalına son qoymuş, ədalətli müharibə apararaq torpaqlarımızı geri almışdır. Vətən müharibəsi Azərbaycanın çoxəsrlik tarixinin ən şərəfli hadisəsi olmaqla bərabər, həm də xalqımızın ədalətli mübarizəsinin bariz nümunəsidir.
Vətən müharibəsində qazanılmış tarixi Zəfərlə Azərbaycan Respublikası ərazi bütövlüyünün həmişəlik təmin olunması problemini həll etmişdir. İtirilmiş coğrafi ərazilərin bərpa edilməsi, vətən torpaqlarının geri qaytarılması öz növbəsində ölkəmizin ərazi-inzibati bölgüsünün iqtisadi rayonlar üzrə müəyyən edilməsi məsələsinə yenidən baxılması zərurətini meydana çıxarmışdır. Azərbaycan Respublikasının Prezidenti İlham Əliyevin 7 iyun 2021-ci il tarixli Sərəncamı ilə ərazi bütövlüyü şəraitində ölkəmizin coğrafi ərazisində əvvəl mövcud olmuş 10 iqtisadi rayon əvəzinə işğaldan azad edilmiş rayonların əraziləri də nəzərə alınmaqla 14 iqtisadi rayonun yaradılması Vətən müharibəsindən sonra ölkədə yaranmış yeni reallığın obyektiv ifadəsidir. Yeni ərazi-inzibati bölgü əsasında Qarabağ və Şərqi Zəngəzur iqtisadi rayonlarının yaradılması Vətən müharibəsində qazanılmış tarixi Zəfərin meydana çıxardığı gerçəklikdən doğan addımlardır.
Şərqi Zəngəzur iqtisadi rayonunun yaradılması vaxtilə işğal edilmiş Qərbi Zəngəzurun hüdudlarında müstəqil Azərbaycan dövlətinin sərhədlərinin daha da möhkəmləndirilməsinə və bu iqtisadi rayonun inkişafına xidmət edir. Şərqi Zəngəzur iqtisadi rayonu həm də region dövlətlərinin hərtərəfli inkişafına geniş imkanlar yaradacaq Zəngəzur dəhlizinin yaradılmasına açılmış qapıdır. Göründüyü kimi, Vətən müharibəsindəki Zəfərin ardınca Qarabağa və ətraf bölgələrə yenidən qayıdış mühüm ictimai-siyasi və iqtisadi əhəmiyyətə malik olan bir prosesə çevrilmişdir. Hazırda Qarabağın və Şərqi Zəngəzurun ayrı-ayrı rayonlarını əhatə edən genişmiqyaslı yollar şəbəkəsi Böyük Qayıdışın və Böyük Quruculuq Hərəkatının mükəmməl yol xəritəsidir. Yüksək dünya standartlarına cavab verən bu yollar şəbəkəsi Qarabağın yenidən qurulmasını və daha da inkişaf etdirilməsini təmin edən, lazım gəldikdə hərbi-strateji vəzifələrin də həyata keçirilməsi üçün əlverişli imkanlar yaradan magistrallardır. Regionda icrasına başlanmış genişmiqyaslı dəmir yolları və hava yolları şəbəkələri Qarabağın və Şərqi Zəngəzurun inkişaf etdirilməsi ilə bərabər, həm də qonşu dövlətlərlə əlaqələrin yenidən qurulmasına və turizmin inkişafına meydan açan möhtəşəm layihələrdir. Azərbaycan Respublikasının Prezidenti İlham Əliyevin Şərqi Zəngəzurda, Laçında, Kəlbəcərdə, Qubadlıda, Zəngilanda və Cəbrayılda təməllərini atdığı hava limanları, yaşayış məskənləri, tunellər, yollar da regionun hərtərəfli inkişafına xidmət göstərəcəkdir. Cənab Prezident çıxışında ötən işğal dövründə erməni vandalları tərəfindən Qarabağda eləcə də, Şərqi Zəngəzur bölgəsində törədilmiş dağıntılara, vəhşiliyə və cinayətə də toxunaraq, erməni işğalçı ordusunun bəzi hərbi hissələrinin yerləşdiyi bir neçə inzibati binadan başqa Zəngilan rayonunun demək olar ki, yerlə-yeksan edilməsini xatırlatdı. Bu mənada Azərbaycanın Müzəffər Milli Ordusu təkcə torpaqlarımızı işğaldan azad etmədi, həm də dünya erməniliyi üzərində böyük qələbə çalmaqla, bölgəmizi erməni faşizmindən xilas etdi. Bu gün möhtərəm Prezidentimizin tapşırığı ilə bütün işğaldan azad olunmuş ərazilərdə olduğu kimi Zəngilan ərazisində də Heydər Əliyev Fondunun maliyyə dəstəyi ilə geniş bərpa quruculuq işləri aparılır. Ölkə başçısı çıxışında demək olar ki, tam dağıdılmış Zəngilan şəhər məscidinin hazırda əsaslı təmir olunduğunu, ilk pilot layihə kimi Zəngilanın Ağalı kəndinin yüksək standartlarla yenidən qurulduğunu bildirdi. Prezidentimiz çıxışında qeyd etmişdir ki, qurulan bu smart kəndlərdə yaşayacaq keçmiş məcburi köçkün adlandırdığımız vətəndaşlarımız üçün təhlükəsizlik, rahatlıq, rifah, məşğulluq kimi bütün amillər nəzərə alınır.
   Cənab Prezidentin çıxışını dinləyərkən qısa müddət ərzində işğaldan azad olunmuş torpaqlarımızda nə qədər möhtəşəm işlərin görüldüyünün şahidi oluruq. Hazırda Zəngilan rayonunda böyük infrastruktur layihələrinin icra edildiyini qeyd edən Möhtərəm Prezidentimiz günümüzün reallığı kimi Zəngəzur dəhlizinin tərkib hissəsi olan nəqliyyat infrastrukturunun, çox funksiyalı Zəngilan Beynəlxalq Hava Limanının istismara veriləcəyini, Zəngilanın gələcəkdə beynəlxalq nəqliyyat-logistika mərkəzinə çevriləcəyini bildirdi. Zəngilan rayonunun ərazisindən keçən həm dəmir yolu, həm avtomobil yolu Azərbaycanın əsas hissəsini Naxçıvanla birləşdirməklə bərabər, beynəlxalq yükdaşımaları üçün beynəlxalq səviyyəli yeni bir yol olacaqdır. Möhtərəm Prezidentimiz Zəngəzur dəhlizinin də gələcək perspektivindən danışarkən bu dəhlizin Azərbaycanın əsas hissəsini Naxçıvan Muxtar Respublikası ilə birləşdirərək, tam yeni nəqliyyat dəhlizi olacağını vurğuladı. Zəngəzur dəhlizinin ölkəmizin qonşu dövlətlərlə əlaqələrində əlavə imkanlar yaradacağını da qeyd etdi.
Cənab Prezident Qarabağın perspektivliyindən danışarkən azad edilmiş torpaqların xüsusilə Laçın, Kəlbəcər, o cümlədən Qubadlı, Zəngilan rayonlarının təbii iqliminin və coğrafiyasının geniş kənd təsərrüfatı potensialına malik olmasını və gələcəkdə görüləcək işlərin, əhalimizin ərzaq təhlükəsizliyinin təmin edilməsində xüsusi önəm daşıdığını da vurğuladı. Cənab İlham Əliyev Zəngilan rayonunun, eləcə də Qarabağın digər rayonlarının çox gözəl və füsunkar təbiətə malik olmasını qeyd edərək, turizmin inkişafı və potensialı haqqında fikirlərini söylədi: “Zəngilan rayonunun turizm potensialı, əlbəttə ki, digər rayonlarda yaradılacaq turizm imkanları ilə də uzlaşdırılmalıdır. Otellər, istirahət zonaları yaradılmalı, kənd turizmi inkişaf etdirilməlidir. Bu, oraya qayıdacaq insanlar üçün də məşğulluq və gəlir mənbəyi olacaq”.
    Prezitentin çıxışının önəmli istiqamətlərindən biri də işğal dövründə işğal altında olan min hektarlarla torpaqların ekologiyasına ermənilərin vurduğu böyük zərər haqqında fikir və tövsiyələridir. Çıxışı zamanı Kəlbəcər, Laçın, Zəngilan və Qubadlı rayonlarında meşələrin kütləvi surətdə qırılması prosesindən, “Bəsitçay” təbiət qoruğunun bir hissəsinin məhv edilməsindən söz açaraq, qızıl və digər qiymətli metallar yatağının vəhşicəsinə istismar olunmasından danışdı. ”Oxçuçay”ın da Ermənistanın ekoloji terroruna məruz qalmasına fikirlərini bildirərək, Ermənistanda istismar edilən mis kombinatının bütün axıntılarının “Oxçuçay”a təmizlənmədən ötürüldüyünü qeyd etdi.
Möhtərəm Prezidentimiz cənab İlham Əliyevin çıxışı Vahid Hacıyevə tövsiyə və tapşırıq olmaqla bərabər, həm də beynəlxalq ictimaiyyətə, erməni faşizmini dəstəkləyənlərə və onlarla iş birliyində olanlara da ciddi mesaj idi. Ümumiyyətlə möhtərəm Prezidentimizin hər çıxışını həm də sanki, görülən işlər haqqında xalqa hesabatı da adlandırmaq olar. Bu da onun xalqına olan sonsuz məhəbbət və ona etimad göstərmiş xalq qarşısında nadir liderlərə məxsus məsuliyyət və hesabatlılıqdan irəli gəlir. Bu nöqteyi nəzərdən onun videoformat şəklində keçirdiyi qəbulu və çıxışını Şərqi Zəngəzurda, Zəngilanda, eləcə də bütün Qarabağda görülmüş işlərin hesabatı adlandırmaq olar.


                                                                            Suraxanı RİHB-nin Bülbülə 
                                                                            qəsəbə inzibati ərazi idarəsi üzrə 
                                                                            nümayəndəsi Elçin Seyfullayev