Prezidentin şəhid ailələri ilə bağlı dövlət orqanları qarşısında qoyduğu tapşırıqlar yerinə yetirilir - Azər Qarayev 

   Azərbaycan dövləti şəhid ailələrinin, Qarabağ müharibəsi veteranları və qazilərinin sosial təminatı üçün lazım olan bütün tədbirləri həyata keçirir. Bu həssas kateqoriyadan olan insanlar dövlətin birbaşa qayğısı ilə əhatə olunub. Prezident İlham Əliyevin şəhid ailələri və qazilərlə bağlı dövlət orqanları qarşısında qoyduğu konkret tapşırıqlar yerinə yetirilir.
Bu sözləri Trend BİA-nın "Sahil Kərimli ilə Aktual" müəllif videolayihəsinə müsahibəsində xüsusi xidmət orqanlarının veteranı, 1-ci Qarabağ müharibəsinin iştirakçısı, polkovnik Azər Qarayev bildirib. A.Qarayev qeyd edib ki, Qarabağ qazilərinə və şəhid ailələrinə göstərilən diqqət və qayğı daim dövlətimiz üçün bir nömrəli məsələ olub:
"Dünyanın heç bir yerində müharibə əlillərinə belə qayğı göstərilmir. Azərbaycan bu baxımdan nümunəvi ölkədir. Qarabağ qazilərinə, şəhid ailələrinə mənzillər, avtomobillər verilir, əlil olmuş hərbçilərimizin müayinə və müalicəsi, hətta xarici ölkələrdə tibbi yardım alamaları təmin edilir. Onların sosial təminatı yaxşılaşdırılır, aylıq müavinatlar verilir. Əlil olan qazilər yeni nəsil protezlərlə təmin olunur. Bu işdə Heydər Əliyev Fondu və YAŞAT Fondunun fəaliyyətini xüsusi qeyd etmək lazımdır. Bütün bu humanist addımlar təqdirəlayiqdir və cəmiyyətimiz tərəfindən xüsusi məmnunluqla qarşılanır".
Azər Qarayev onu da bildirib ki, bu istiqamətdə müəyyən nöqsanlar da var, bəzən dövlət qurumlarının bəzi əməkdaşları məsuliyyətsizlik edir, verilən tapşırıqları sona kimi yerinə yetirmir, qazilərimizin problemlərinə ciddi yanaşmır və nəticədə haqqlı narazılıqlar yaranır: "Təəssüf ki, belə neqativ hallar var. Bu kimi nöqsanlar şübhəsiz ki, aradan qaldırılır. Lakin, qazilərin bu problemlərini şişirdib bundan öz çirkin siyasi məqsədləri üçün istifadə edən qüvvələr də var. Əsl təəssüf doğuran hal budur. Hamı bilməlidir ki, Azərbaycan dövlətinin sosial siyasətinə heç bir qüvvə kölgə sala bilməz".
Polkovnik daha sonra 44 günlük Vətən Müharibəsində iştirak edən bəzi qazilərin intihar etməsi faktları və müxalifət qüvvələrin faciədən vicdansızcasına istifadə etməsinə də münasibət bildirib:
"Müharibənin dəhşətləri uzun illər insanların yaddaşlarından silinmir. Bəzən hərbçilərdə psixoloji pozuntular, ruhi sarsıntılar yaranır. Özünə qapılan qazilər intihara cəhd edir. Belə hallar təkcə bizim ölkədə baş vermir, dünyanın ən inkişaf etmiş ölkələrində də belə intiharlara rast gəlinir. Amma çox təəssüf ki, yaramaz qüvvələr bu hadisələri də siyasiləşdirir, cəmiyyət arasında çaşqınlıq yaratmaq istəyir. Bu yolverilməzdir".
A.Qarayev Azərbaycan vətəndaşlarını, şəhid ailələri və müharibə vetereanlarını bu təxribatlara uymamağa, təmkinli olmağa, problemləri ilə bağlı dövlət orqanlarına müraciət etməyə çağırır.
Müsahibənin videovariantını təqdim edirik.

---

---