Böyük Qayıdış proqramı çərçivəsində 8 iyul 2026-cı il tarixində Azərbaycanın qədim torpaqları olan Şuşa və Xocavənd rayonlarına növbəti köç karvanları yola salınıb. Uzunillik yurd həsrətinə son qoyan daha 54 ailə (210 nəfər) doğma torpaqlarında müasir standartlara uyğun inşa edilmiş yeni mənzillərin açarlarını təhvil alıb.

   Sedanews.Az xəbər verir ki, Dövlət Qaçqınkomun verdiyi məlumata əsasən, bu mərhələdə köç karvanı Bakı və Respublikanın digər ərazilərindəki müvəqqəti məskunlaşma yerlərindən (yataqxana, sanatoriya və düşərgələrdən) hərəkət edərək aşağıdakı kəndlərdə məskunlaşıb: Kiçik Qaladərəsi (Şuşa): 15 ailə (51 nəfər)  Quzeyxırman (Xocavənd): 21 ailə (87 nəfər)? Güneyxırman (Xocavənd): 18 ailə (72 nəfər)

  Mərasim zamanı sakinləri qarşılayan rəsmi nümayəndələr kəndlərin açarlarını ailə başçılarına təqdim edib, onların yeni evlərində firavan həyat arzulayıblar.

   Qarabağ və Şərqi Zəngəzurun yenidən qurulması planına uyğun olaraq, hər üç kənddə sakinlərin rahatlığı üçün genişmiqyaslı işlər görülüb.

  Dövlət proqramına əsasən, qayıdan əhalinin məşğulluğunun təmin edilməsi məqsədilə kənd təsərrüfatı, heyvandarlıq və xidmət sahələrində yeni iş yerlərinin yaradılması prosesi də paralel olaraq davam etdirilir.