İmişli sakini İntiqam Əvəzov iddia edir ki, ailəsinə məxsus bazar qanunsuz olaraq əlindən alınıb və bu prosesin Prezident Administrasiyasının sabiq rəhbəri Ramiz Mehdiyevin tapşırığı ilə həyata keçirildiyini bildirir.
Sedanews.az Milli.Az-a istinadən xəbər verir ki, globalinfo.az-a müraciət edən şəxs deyib ki, atası mərhum Rüstəm Əvəzov 1995-ci ildən İmişli rayon kolxoz bazarının müdiri olub. 1999-cu ildə "Özəlləşdirmənin 1-ci Dövlət Proqramı" çərçivəsində keçirilən hərracda Rüstəm Əvəzov, eləcə də onun qardaşları Əvəz və Məcnun Şükürovlar müəssisənin 55 faiz səhmini qanuni yolla əldə ediblər. Ailənin sözlərinə görə, bu faktı təsdiqləyən sənədlər - hərrac protokolu, səhm sertifikatları və səhmdar reyestrləri bu gün də onların əlindədir.
  Şikayətçilər iddia edirlər ki, 2000-ci ildə keçmiş deputat və Ramiz Mehdiyevin kürəkəni İlham Əliyevin biznes ortağı Əziz Quliyev adlı şəxs özəlləşdirmənin nəticələrinin ləğvi tələbi ilə məhkəməyə müraciət edib. Onların sözlərinə görə, uzun illər davam edən məhkəmə çəkişmələrində əvvəlki instansiyalar ailənin xeyrinə qərar versə də, Ali Məhkəmə Ramiz Mehdiyevin müdaxiləsi ilə Əziz Quliyevin xeyrinə qərar çıxarıb. Bunun nəticəsində ailə bazardan məhrum olub.
   İ.Əvəzovun sözlərinə görə, bu hadisə ailəsini həm maliyyə, həm də mənəvi cəhətdən sarsıdıb. O bildirib ki, atası Rüstəm Əvəzov 2002-ci ildə, əmisi Məcnun Şükürov isə 2020-ci ildə baş verən ədalətsizlik və uzunmüddətli stress nəticəsində dünyasını dəyişiblər.
Şikayətçilər qeyd edirlər ki, Ramiz Mehdiyev vəzifədən uzaqlaşdırıldıqdan və onun fəaliyyəti ilə bağlı araşdırmalar başladıqdan sonra ədalətin bərpa olunacağına ümid yaranıb.
   Onların fikrincə, Mehdiyevin göstərişləri əsasında hərəkət edən şəxslərin, o cümlədən Əziz Quliyevin də əməlləri araşdırılmalı və məsuliyyət məsələsinə hüquqi qiymət verilməlidir.
   "Əziz Quliyev 25 ildən artıqdır ki, İmişli bazarını qanunsuz olaraq əlində saxlayır, vergidən yayınmaqla böyük sərvət qazanıb. Onun barəsində qanunsuz varlanma, özgə əmlakını ələ keçirmə və vergidən yayınma faktları üzrə ciddi araşdırma aparılmalıdır".
   Bundan başqa, şikayətçi onların xəbəri olmadan 25 il öncə Nəsimi rayonunda məhkəmənin keçirildiyini bildirib:
"Maraqlıdır ki, məhkəmə Əziz Quliyevin xeyrinə qərar çıxarmışdı. Bunun əsasında Xətai rayon Məhkəməsinə müraciət edib, qalib gəldik. Bunlar isə Ulu Öndər Heydər Əliyevin sayəsində baş tutdu. Çünki əmim Heydər Əliyevə məktub ünvanlamışdı deyə, işimizə baxılması üçün tapşırıq verilmişdi. Lakin məhkəmə qərarı icra olunmadı. Özləri də dedilər ki, onlara təzyiq göstərilir. Hətta Apelyasiya Məhkəməsi də xeyrimizə qərar çıxardı. Amma 8 aydan sonra iş Ali Məhkəməyə verildi və onların xeyrinə qərar verildi. Onda da hakim Südabə xanım idi. Adam açıq şəkildə bizə dedi ki, mən işi sizin xeyrinizə çıxarsam, məni Mehdiyev ailəsi öldürəcək".
  İntiqam Əvəz 25 ildən sonra məsələnin işıqlandırılmasını belə izah edib:
"Ramiz Mehdiyevə görə heç kim işimizə ədalətli yanaşa bilmirdi. Biz gözləyir və inanırdıq ki, nə vaxtsa Ramiz Mehdiyev vəzifədən kənarlaşdırılacaq və ya dünyasını dəyişəcək. İndi isə ölmədi, amma ölməkdən daha pis hala düşdü. Adam Vətən xaini kimi ifşa olundu".