Müasir həyatın sürətli ritmi bir çox insanı rahat, tez hazırlanabilən qidalara üstünlük verməyə vadar edir. Bu səbəbdən kolbasa və sosislər dünya üzrə olduğu kimi, Azərbaycanda da süfrələrin dəyişməz "qonağı"na çevrilib. Lakin bu rahatlıq bəzən sağlamlıq üçün ciddi təhlükə yaradır.
  Qida sahəsində fəaliyyət göstərən mütəxəssislər illərdir xəbərdarlıq edirlər: tərkibində çoxlu miqdarda konservant, süni boya, natrium nitrat və digər kimyəvi maddələr olan emal olunmuş ət məhsulları – xüsusilə kolbasa və sosislər – uzun müddətli istehlak zamanı orqanizmdə ciddi fəsadlara yol aça bilər.
   Maraqlıdır: əgər bu qidalar zərərlidirsə, niyə istehsal bu qədər genişlənir? Cavab sadədir – tələb var. İnsanlar vaxt, rahatlıq və alışqanlıq səbəbindən bu məhsulları seçməyə davam edir. İstehsalçılar isə tələbi qarşılayır, bəzən keyfiyyəti artırır, amma əsas məsələ – sağlamlıq riski – hələ də gündəmdədir.
 Bununla belə, məsuliyyət təkcə istehsalçı və ya satıcının deyil, istehlakçının da üzərinə düşür. Etiket oxuma vərdişi, tərkibə diqqət yetirmə, balanslı qidalanma kimi yanaşmalarla zərərin qarşısını qismən almaq mümkündür.
  Nəticə olaraq, kolbasa və sosislər “dadlı düşmən” olaraq qalır. Seçim bizimdir: sağlamlıq, yoxsa rahatlıq?
   Sedanews.az