Son illərdə daşınmaz əmlak bazarında maraqlı bir tendensiya müşahidə olunur. Bakıda və digər böyük şəhərlərdə bina evlərinin 1 kv/m qiyməti, bir çox hallarda həyət evlərinin kvadrat metrindən daha yüksək olur. Bu isə cəmiyyət arasında haqlı suallar doğurur: Niyə eyni ölçüdəki həyət evi ucuz, amma bina evi daha bahadır? Həqiqətən, bu qiymət fərqini nə müəyyən edir?
   Ekspertlərin fikrinə görə, məsələ təkcə evin tikinti materialında, yoxsa yerində deyil, həm də onun yerləşdiyi infrastruktur və alıcı psixologiyasında gizlənir.
 Yer və infrastruktur faktoru
 Bina evləri əsasən şəhərin mərkəzində və ya infrastruktur cəhətdən inkişaf etmiş ərazilərdə yerləşir. Bu isə yaxınlıqda məktəb, xəstəxana, nəqliyyat, ticarət obyektlərinin olması deməkdir. Həyət evləri isə çox zaman şəhərdən kənarda, bəzən infrastruktursuz ərazilərdə yerləşir.
 Hüquqi status və sənədləşmə
Bina evləri adətən tam sənədli – “kupçalı” olur. Amma həyət evlərinin böyük bir qismi sənədsizdir. Bu da onun bank krediti ilə alınmasını və ya gələcəkdə satışını çətinləşdirir. Sənədləşmə problemi evin qiymətinə ciddi təsir edir.
 Təhlükəsizlik və kommunal xidmətlər
 Binalarda kamera nəzarəti, domofon sistemi, lifti, istisalı və digər xidmətlər olduğundan alıcılar özlərini daha rahat və təhlükəsiz hiss edir. Həyət evində isə bütün məsuliyyət ev sahibinin üzərindədir.
  Alıcı zövqü və rahatlıq
 Gənc ailələr və ya tək yaşayan şəxslər bina evlərinə üstünlük verirlər. Səbəb isə həyət baxımı, əlavə məsuliyyət və qış aylarında isitmə problemlərinin olmamasıdır.
  Həyət evlərinin üstünlükləri
 Həyət evləri sakit mühit, şəxsi sahə, torpaq sahibi olmaq, təmiz hava və genişlik baxımından üstünlük təşkil edir. Ailəli, çoxuşaqlı ailələr üçün həyət evi daha rahat ola bilər. Əlavə tikinti və genişlənmə imkanları da mövcuddur.
  Bina evlərinin baha olması sadəcə kvadrat metr məsələsi deyil. Bu, kompleks faktorların cəmidir. Amma qərar verməzdən əvvəl hər kəs öz həyat tərzini və gələcək planlarını nəzərə almalıdır.
  Unutmayaq ki, ev sadəcə daşdan ibarət bir bina deyil, insanın özünü təhlükəsiz və rahat hiss etdiyi yerdir. 

   Sedanews.az