Müasir dövrdə vətəndaşların üzləşdiyi əsas gündəlik problemlərdən biri ictimai nəqliyyata xərclənən vəsaitin artmasıdır. Xüsusilə də aşağı və orta gəlirli insanlar üçün bu məsələ ciddi yükə çevrilib. Hər gün işə, məktəbə və digər zəruri istiqamətlərə gedən insanlar nəqliyyat xərcləri üçün aylıq olaraq böyük məbləğlər ödəməli olurlar. Bu isə aylıq büdcəyə əhəmiyyətli təsir göstərir.
  Bir vaxtlar olan, indi isə olmayan bir sistem: Aylıq nəqliyyat kartları
Sovet dövründə geniş istifadə olunan aylıq ödənişli nəqliyyat kartları çoxlarına tanışdır. Bu kartlar sərnişinlərə istədikləri qədər ictimai nəqliyyatdan istifadə imkanı yaradırdı. Sistem sadə idi: vətəndaş ayın əvvəlində müəyyən məbləğ ödəyir, ay boyunca metro və avtobusdan limitsiz istifadə edirdi. Bu, həm büdcə baxımından qənaət idi, həm də insanlar üçün rahatlıq yaradırdı.
  Almaniya, Fransa, Yaponiya kimi inkişaf etmiş ölkələrdə aylıq, hətta illik nəqliyyat kartları geniş yayılıb. Almaniyada 49 avroluq "Deutschlandticket" ilə bütün ölkə üzrə ictimai nəqliyyatdan istifadə mümkündür. Bu yanaşma həm sərnişin məmnuniyyətini artırır, həm də avtobus və metro istifadəsini təşviq edir.
   Hazırda Azərbaycanda "BakıKart" sistemi fəaliyyət göstərir, lakin bu kartla ödəniş ancaq istifadə əsasında həyata keçirilir. Yəni hər dəfə minik zamanı balansdan vəsait çıxılır. Aylıq limitsiz kart sistemi isə tətbiq olunmur. Bu isə, xüsusilə gündə bir neçə dəfə nəqliyyatdan istifadə edən sərnişinlər üçün xərcləri artırır.  
   Mütəxəssislərə görə, aylıq limitsiz kart sistemi dövlətə qısa müddətdə xərcli görünsə də, uzunmüddətli perspektivdə həm sərnişin məmnuniyyətini artırır, həm də ictimai nəqliyyata tələbatı çoxaldaraq şəxsi avtomobillərdən istifadənin azalmasına səbəb olur. Bu da öz növbəsində tıxacların və ekologiyanın yaxşılaşdırılmasına təsir göstərir.
  Aylıq limitsiz nəqliyyat kartlarının yenidən tətbiqi həm sərnişinlər üçün iqtisadi baxımdan faydalı olar, həm də ictimai nəqliyyatın rolunu artırar. Dövlət qurumlarının bu mövzunu yenidən gündəmə gətirməsi və pilot layihə olaraq tətbiq etməsi cəmiyyətin marağına səbəb ola bilər.   
   Unutmayaq: qənaət təkcə pula deyil, həm də zamana aiddir.
 
   Sedanews.az