
Ekoloji təmiz və göz oxşayan “Ağ şəhər”də yeni layihələr icra olunur
Bir zamanlar əsl ekoloji fəlakət zonasına çevrilən ,qara şəhər adı qazanmış bir məkanda indi ekoloji təmiz və göz oxşayan yeni bir yaşayış massivinin yaranacağına heç kim inanmazdı.
Qara şəhər XIX əsrin sonunda Bakının şərq hissəsində meydana gəlib. Sonradan o qara qızılın emal olunması saxlanılması və nəql edilməsi üzrə fəaliyyəti yerinə yetirərək, 100 ildən artıq bir müddətdə neft sənayesində mühüm rol oynayıb
Bir əsirdən çox müddətdə bu ərazidə müxtəlif neft və kimya müəssisələri fəaliyyət göstərib. Həmin müəssisələrin hisi, tüstüsü və qoxusu bu ərazidə yaşayan insanların sağlamlığına mənfi təsir göstərirdi, oradakı yaşıllıqları məhv edirdi. Şəhərin bu tarixi hissəsini yenidən qurmaq məqsədilə ölkə başçısının Sərəncamı ilə təsdiq olunmuş “Azərbaycan Respublikasında ekoloji vəziyyətin yaxşılaşdırılmasına dair 2006-2010-cu illər üçün Kompleks Tədbirlər Planı”na əsasən Bakı Ağ Şəhər ekoloji şəhərsalma layihəsi həyata keçirilir. Layihə 1650 hektar sahədə yerləşən şəhər mərkəzinin şərq hissəsinin Qara şəhər bərpa və inkişafını, həmçinin Bakının yeni müasir mərkəzinə çevrilməsini nəzərdə tutur.
“Bakı Ağ Şəhər” layihəsi çərçivəsində köhnə sənaye obyektləri şəhərin hüdudlarından kənara çıxarıldı, yüz ildən artıq bir müddətdə neftlə çirklənmiş torpaqların təmizlənməsi və sahilyanı bulvarın abadlaşdırılması işləri həyata keçirildi. “Bakı Ağ Şəhər” layihəsinin Baş Planı 10 universal şəhər tipli məhəllənin salınmasını nəzərdə tutur. Onların hər birində sakinlərin yaşayışı, işləməsi, istirahəti və əyləncəsi üçün ən yaxşı şərait yaradılması planlaşdırılır. Layihə çərçivəsində tikintinin ümumi sahəsi 15 milyon kvadratmetrdir. Ağ şəhərdə evlər, ofislər, inzibati dövlət binaları tikilir, parklar salınır və digər obyektlər inşa olunur. Bu isə təxminən 120 min mənzil, xidmət obyekti və 240 min iş yeri deməkdir.
Buradakı infrastruktur layihələrinin hər birində ekoloji məsələlər nəzərə alınıb, sonrakı fəaliyyətdə ekoloji tarazlığın saxlanılması, xüsusilə yaşıllıq ərazilərinin salınması, maksimum park, ekoloji və estetik görünüş yaradan layihələr icra olunub və bu işlər davam etməkdədir.
Beləliklə, ekoloji cəhətdən Bakının “Qara şəhəri” nə çevrilmiş bir ərazi indi ekoloji təmiz və göz oxşayan şəhər içərisində yeni bir şəhərə çevrilməkdədir.
Mətndə səhv var? Onu siçanla seçin və Ctrl+Enter düyməsini basın.