Quba rayonunun Zərdabi Barlı kəndində illərdir davam edən susqunluq və laqeydlik artıq dözülməz həddə çatıb. Kənd sakinləri bələdiyyə sədri Kərəm Məmmədovun fəaliyyətsizliyindən, vətəndaşlara qarşı laqeyd və aqressiv münasibətindən şikayətçidirlər. Uzun illərdir bu vəzifəni icra edən Kərəm Məmmədov, görünür, vəzifəsini şəxsi maraqlar üçün “təcrid olunmuş kabinet səviyyəsində” davam etdirməkdədir.
Kəndin yolları bərbad vəziyyətdədir. Yağışlı havalarda keçilməz bataqlığa, quru havalarda isə toz dumanına çevrilən bu yollar gündəlik həyat üçün ciddi çətinliklər yaradır. Uşaqlar məktəbə, insanlar işə çətinliklə gedib-gəlir. Yaşlılar və xəstələr üçün isə bu yollar sözün əsl mənasında təhlükə mənbəyidir.
Su, kanalizasiya, məişət tullantılarının daşınması kimi sosial xidmətlər ya yox səviyyəsindədir, ya da sakinlər öz hesablarına bu problemləri həll etməyə məcbur olurlar. Halbuki bələdiyyənin əsas vəzifəsi elə bu sahələrdə əhaliyə xidmət göstərməkdir.
Kəndin qürur mənbəyi olan şəhidlərin xatirəsinə ucaldılmış “Şəhidlər bulağı” belə, rəsmi strukturların deyil, kənd camaatının şəxsi vəsaiti ilə inşa olunub. Bu fakt suallar doğurur:
Bələdiyyənin şəhid ailələrinə, şəhid xatirəsinə münasibəti niyə bu qədər laqeyddir?
Dövlət tərəfindən ayrılan büdcə vəsaitləri hansı məqsədlərə xərclənir?
Əgər şəhid bulağını da kənd camaatı inşa edirsə, bələdiyyə hansı işi görür?


Bələdiyyə sədri ilə görüşmək istəyən vətəndaşlar saatlarla qapıda gözlədilir. Çox zaman isə “qonağım var”, “indi məşğulam”, “növbəti həftə gəlin” kimi cavablarla geri qaytarılırlar. Hətta kənd sakinlərinin və jurnalistin suallarına aqressiv cavab verərək, “gedin yazın, mən də sizi lazım olan yerə şikayət edəcəyəm” deməsi onun ictimai tənqidlərdən yayınmaq istəyini ortaya qoyur.
Bu davranışla bələdiyyə sədri nəyi ört-basdır etmək istəyir? Əgər gördüyü işlərə inanırsa, niyə ictimaiyyət qarşısında cavab verməkdən çəkinir?
Açıq suallar və tələb olunan cavablar:

1. Zərdabi Barlı kəndində son 5 ildə hansı sosial layihələr icra olunub və bu layihələrə nə qədər vəsait ayrılıb?
2. Şəhid bulağının tikintisinə bələdiyyə nə qədər dəstək verib?
3. Bələdiyyə binasına daxil olub sədrlə görüşmək niyə bu qədər müşkül məsələyə çevrilib?
4. Bələdiyyənin 2023-cü il maliyyə hesabatı ictimaiyyətə niyə açıqlanmır?
5. Kənd yollarının bərpası və sosial problemlərin həlli üçün yerli və mərkəzi strukturlara nə vaxt və hansı müraciətlər olunub?

Zərdabi Barlı kəndi susmur, gözləmir və susdurula da bilməz. Kəndin şəhidləri, gəncləri, yaşlıları və balaları daha ləyaqətli həyat tərzinə layiqdir. Vətəndaşların səsi eşidilməli, yerli idarəetmənin fəaliyyəti şəffaf olmalıdır. Əgər bələdiyyə sədri bu vəzifəni icra edə bilmirsə, vəzifədən getməlidir. 
Media qurumları, hüquq müdafiə təşkilatları və aidiyyəti dövlət orqanları bu məsələyə ciddi yanaşmalıdır.

Afət Məmmədova 

---

---