Sedanews.Az xəbər verir ki, istintaqla Orxan Musayevin 2020-2025-ci illərdə qeyd olunan vəzifədə işləyərkən vəzifə səlahiyyətlərindən sui-istifadə etməklə Xırdalan bələdiyyəsinə məxsus 1.92 ha torpaq sahəsini 75 şəxsə qanunvericiliklə müəyyən edilmiş qiymətdən ucuz qiymətə satmaqla 600 min manatdan artıq ziyan vurmasına əsaslı şübhələr müəyyən edilib. Keçmiş bələdiyyə rəhbəri dövlət və bələdiyyə əmlakını külli miqdarda mənimsəməkdə və vəzifə səlahiyyətlərindən sui-istifadə etməkdə ittiham olunur.

   Hüquq-mühafizə orqanlarından daxil olan məlumatlara görə, aparılmış istintaq tədbirləri nəticəsində sabiq bələdiyyə sədrinin rəhbərlik etdiyi dövrdə ciddi maliyyə yeyintilərinə yol verdiyi aşkarlanıb. İttiham aktında qeyd olunur ki, bələdiyyə torpaqlarının qanunsuz satışı, sənədlərin saxtalaşdırılması və büdcə vəsaitlərinin təyinatından kənar xərclənməsi yolu ilə dövlətə və vətəndaşlara külli miqdarda maddi ziyan vurulub.

  İstintaq materiallarında sabiq məmurun bələdiyyə mülkiyyətində olan torpaq sahələrini müvafiq rəsmi prosedurlardan kənar, saxta qərarlarla müxtəlif şəxslərin adına rəsmiləşdirdiyi barədə təkzibolunmaz sübutlar yer alıb.

  Cinayət işi üzrə sabiq bələdiyyə sədrinə qarşı Azərbaycan Respublikası Cinayət Məcəlləsinin müvafiq maddələri ilə ittiham irəli sürülüb:

Maddə 179.3.2 (Mənimsəmə və ya israf etmə — külli miqdarda törədildikdə) Maddə 308 (Vəzifə səlahiyyətlərindən sui-istifadə etmə)

Maddə 313 (Vəzifə saxtakarlığı).

   Qeyd olunan maddələr üzrə təqsirləndirilən şəxsi uzunmüddətli azadlıqdan məhrumetmə cəzası gözləyir. Hazırda cinayət işi baxılması üçün aidiyyatı üzrə Sumqayıt Ağır Cinayətlər Məhkəməsinə göndərilib. Yaxın günlərdə məhkəmənin hazırlıq iclasının keçiriləcəyi gözlənilir.

   Ekspertlər qeyd edirlər ki, yerli özünüidarəetmə orqanlarında aparılan bu növ yoxlamalar və həbslər ölkədə korrupsiyaya qarşı həyata keçirilən genişmiqyaslı islahatların tərkib hissəsidir. Xüsusilə Abşeron rayonu və Xırdalan şəhəri kimi urbanizasiyanın sürətli olduğu bölgələrdə torpaq resurslarının idarə olunmasına nəzarət daha da sərtləşdirilib.

  

---

---