sedanews.az
sedanews.az

Prezidentdən ikibaşlı suala tarixi cavab

24-01-2020, 11:12 41 dəfə baxılıb

Prezidentdən ikibaşlı suala tarixi cavab



                Davos Forumu mühüm platformadır və Azərbaycan Prezidentinin bu platformadan milli maraqlarımız və iqtisadi mövqelərimiz üçün maksimum istifadəsi nəinki regionda, artıq dünyada maraqla izlənilir.
Prezidentin Davosda dünya liderləri ilə keçirdiyi görüşləri, böyük transmilli şirkətlərlə apardığı müzakirələri, həmçinin bu tribunadan ölkəmizin ən ağrılı problemi – Dağlıq Qarabağla bağlı beynəlxalq hüquqa əsaslanan mövqeyini bir daha gündəmə gətirməsi olduqca mühümdür.
Amma bu forumda daha bir məqam diqqəti çəkdi: artıq regional siyasətdə tutduğu mövqe səbəbindən Azərbaycanın fərqli bir status qazandığı müşahidə olundu. Çox güman ki, bu statusa NATO-Rusiya görüşlərinin hər iki gücdən eyni məsafədə qalan və neytrallığı ilə seçilən Bakıda keçirilməsi və bunun artıq ənənəyə çevrilməsi də təsirsiz ötüşməyib.
Əlbəttə, bu mövqeni, bu statusu qazanmaq üçün İlham Əliyev böyük siyasi iradə ilə çoxşaxəli, davamlı siyasət aparıb, transmilli layihələr ortaya qoyub və ən əsası da ölkəni təhlükəsizlik adasına çevirməyi bacarıb.
Bütün bunlar İlham Əliyev siyasətinin məntiqi nəticəsidir və Davos görüşlərində Prezidentimizi diqqət mərkəzinə çevrilməsini şərtləndirir.
Məhz buna görə də bu görüş və çıxışları həssaslıqla izləyənlər sırasındayam və Prezident İlham Əliyevin Davosda “Strateji baxış: Avrasiya” mövzusunda keçirilən panel iclasında moderatorun verdiyi sualı da təsadüfi hesab etmədim.
Sualın həddən artıq düşünülmüş olduğuna heç bir şübhə yoxdur: sanki Azərbaycandan mövqe istənilirdi:
“Avrasiyada indi böyük qüvvələr yerləşib, bir tərəfdən Rusiya, o biri tərəfdən Çin. Azərbaycanın Prezidenti kimi Siz birinci növbədə kimə zəng edərsiniz – Moskvaya, yoxsa Pekinə?”
Böyük bir həyəcanla İlham Əliyevin cavabına diqqət kəsildim və cavabdan sözün həqiqi mənasında heyrətləndim: bir lider nə qədər çevik təfəkkürə, nə qədər yetkin biliyə və prosesləri nə qədər yüksək analiz etmək qabiliyyətinə malik olmalıdır ki, “Pekin, ya Moskva?” seçimi qarşısında hansının adını çəkəcəyi ilə bağlı şəklənən qulaqlara “Bakı” adını desin.
Moderator da, deyəsən, gözləmirdi bu cavabı. Ona görə də “Bakıya...” deyə təkrar etdi.
Adətən belə qlobal səviyyəli tədbirlərdə bu cür dilemmalar qoyulur və məqsəd moderatorun müsahibəyə çalar qatması yox, ölkələrin strateji mövqeyinin ortaya çıxmasına nail olmasıdır. Moderatorun bu sualı əslində Azərbaycanın Avrasiyadakı güclər arasında kimin yanında olduğunu öyrənmək cəhdi idi. Sual isə özündə yalnız iki cavabı ehtiva edirdi: ya Moskva, ya da Pekin.
Prezident İlham Əliyevin bu dilemma qarşısında verdiyi cavab rəsmi Bakının strateji mövqeyinin və müstəqil siyasətinin təzahürü oldu: Azərbaycan heç bir güc mərkəzinə bağlı deyil, bütün ölkələrlə milli maraqları çərçivəsində münasibətlərə önəm verir və milli maraqların hər şeydən uca tutulduğu bir siyasət yürüdür. Bu cavab həm də hazırda Qərb və Şərq cəbhələri arasındakı qlobal toqquşmada Azərbaycanın tərəfsizliyinin bəyan edilməsi idi.
Sərrast diplomatiyaya söykənən bu cavabdan sonra Prezident İlham Əliyev müsahibənin davamında Azərbaycanın strateji mövqeyini ətraflı şəkildə açdı. Bütün qonşularla mehriban münasibətlərə önəm verdiyimizi qeyd edən dövlət başçısı bir daha Azərbaycan üçün qırmızı xəttin məhz milli maraqlar olduğunu göstərdi və müstəqillik illərində əldə olunan bütün nailiyyətlərin xalqımızın azadlıq və müstəqilliyə, demokratiyaya sadiq olmasına, siyasi və iqtisadi sahələrdə çox ciddi islahatlar həyata keçirildiyinə görə əldə olunduğunu vurğuladı.
İndiyə qədər həyata keçirilən bütün işlər, islahatlar və yenilənmənin yeganə məqsədi də məhz Azərbaycanın suverenliyini, müstəqil siyasət yürütmək potensialını qorumaq, onu gücləndirməkdir. Dövlət başçısının “iqtisadi müstəqillik əsas prioritet idi, çünki bu, siyasi müstəqillik üçün bünövrədir” sözlərinin açması da budur.

Müsahibədə diqqətçəkən məqamlardan biri də gənclərlə bağlı məsələdir. Moderator dünyanın müxtəlif yerlərində gənclərin tez-tez küçələrə çıxdığını, bu, Azərbaycanda baş verərsə, necə reaksiya veriləcəyini soruşdu. Prezident İlham Əliyev isə cavabında bildirdi ki, dünyanın müxtəlif yerlərində küçələrə çıxan gəncləri nələrsə qane etmir, hökumətlər yalan vədlər verərək, hakimiyyətə gəliblər.
“Azərbaycanda biz həmişə sözümüzə əməl edirik. Biz heç vaxt yerinə yetirə bilməyəcəyimiz məsələləri dilimizə gətirmirik və insanlarımızın həyat standartları ildən-ilə daha da yaxşılaşır”, - dövlət başçımızın bu sözləri dünyada baş verən etirazlara fərqli baxışı ortaya qoyur. Həmçinin, Azərbaycanda insanların, xüsusilə gənclərin küçələrdə yox, universitetlərdə olduğunun səbəblərini açıqlayır. Çünki Azərbaycanda gənclərin öz gələcəyinə, öz imkanlarını realizə edə biləcəyinə inamı mövcuddur.
Prezident İlham Əliyev bu müsahibəsi ilə Azərbaycanın dünyadakı yerini, strateji mövqeyini və ölkə reallığını beynəlxalq ictimaiyyətə nümayiş etdirdi. Eyni zamanda, proseslərin necə yüksək səviyyədə incələndiyini, həm daxili, həm də xarici siyasətdə səmimiyyətin hakimiyyətlər üçün necə zəruri olduğunu və fərqli, açıq, dürüst, paralel olaraq, çoxşaxəli və həssas bir siyasət apardığını növbəti dəfə göstərdi...
Xüsusilə ölkədən kənarda olanda insan öz Prezidentinin siyasi nüfuzunu və hazırcavablılığını daha aydın görür.
Biz bunu bir daha gördük və İlham Əliyev bizi bir daha qürurlandırdı...






Mətndə səhv var? Onu siçanla seçin və Ctrl+Enter düyməsini basın.
Teqlər:
ŞƏRH YAZ
OXŞAR XƏBƏRLƏR
XƏBƏR LENTİ
BÜTÜN XƏBƏRLƏR
SƏHİYYƏ
İDMAN
ŞOU-BİZNES
DÜNYA