"Neftçi"ni Yunanıstanda gözləyən təhlükə: "Problem çıxsa, UEFA müdaxilə edər"

"Qalatasaray"ın Yunanıstanda üzləşdiyi hadisədən xəbərimiz var. Amma biz avrokubok oyunları zamanı səfərə UEFA-nın testi əsasında çıxırıq. Bu, bütün dünyada qəbul olunur. Həmin test qitə futbol qurumunun göstərişi ilə götürülür".
Bu fikirləri "Report"a açıqlamasında "Neftçi"nin Media, marketinq və ictimaiyyətlə əlaqələr departamentinin rəhbəri Rüstəm Allahverdiyev Türkiyənin "Qalatasaray" komandasının "Olimpiakos"la yoldaşlıq matçı ilə əlaqədar Yunanıstanda ikən qarşılaşdığı problem barədə danışarkən deyib.
Afina aeroportunda İstanbul klubundan bir daha koronavirus testindən keçməsi tələb olunub. Bununla razılaşmayan "sarı-qırmızılılar" hava limanında bir neçə saat gözlədikdən sonra Türkiyəyə qayıdıblar.
Flaqman UEFA Çempionlar Liqasının I təsnifat mərhələsində Gürcüstanın "Dinamo" (Tbilisi) komandasını keçəcəyi təqdirdə, növbəti raundda "Olimpiakos"la qarşılaşacaq. Allahverdiyevin sözlərinə görə, belə bir hadisə istənilən komandanın başına gələ bilər: "UEFA başqa yerdə verdiyimiz analiz nəticələrini qəbul etmir. Həmin testi bu gün saat 17:00-da - Gürcüstanın "Dinamo" (Tbilisi) komandası ilə keçirəcəyimiz Çempionlar Liqasının I təsnifat mərhələsinin cavab görüşü üçün verəcəyik. Bunun nəticəsində futbolçular və əməkdaşlarımıza müvafiq icazə veriləcək. Qurumun özünün təlimatında da var ki, bu testin nəticəsinə əsasən səfərə çıxa bilərsiniz".
Klub rəsmisi hazırda daha çox "Dinamo" ilə cavab oyununu düşündüklərini söyləyib: "Əvvəlcə Yunanıstana getmək qismət olsun. Hər hansı problem çıxarsa, UEFA nümayəndələrinə məlumat veriləcək. "Qalatasaray" Afinaya yoldaşlıq matçı üçün getmişdi. Bizdə isə avrokubok oyunudur. Düşünmürəm ki, bunun üçün Türkiyə klubundan hansısa məsləhət almağa ehtiyac olsun. Bu, UEFA-nın bayrağı altında keçirilən qarşılaşmadır. Bizə problem çıxarsalar, qurum dərhal məsələyə müdaxilə edər. Digər tərəfdən, birinci biz səfərə gedəcəyik. Onlar da buraya gələcəklər, axı".
Qeyd edək ki, "Neftçi" Tbilisidəki ilk oyunda "Dinamo"nu 2:1 hesabı ilə yenib. Cavab görüşü iyulun 14-də "Bakcell Arena"da keçiriləcək və saat 21:00-da başlayacaq.
II təsnifat mərhələsinin oyunları isə 20-21 və 27-28 iyulda olacaq.