Azərbaycanda son 1 ildə yeni tikilən binalarda mənzillərin qiyməti 17-20 faiz arası bahalaşıb.Tikinti İstehsalçıları Assosiasiyasının sədri Ramiz İsayev bildirir ki, əvvəl yeni tikililərdə 90 kvadratmetrlik mənzilin qiyməti 100 min manat idisə, indi bu rəqəm 20 min manat artıb. Belə evlərin satışı isə xeyli azalıb. Mənzil bazarındakı sürətli bahalaşmanın səbəblərinə gəlincə, Ramiz İsayev deyir ki, adətən bunu inşaat materiallarının qiymətinin artması ilə əlaqələndirirlər. Ancaq bazarı təhlil etdikdə digər əngəllərin qiymətlərə daha çox təsir etdiyini görürük. Onun sözlərinə görə, bahalaşmaya səbəb olan əsas amillərdən biri tikinti normalarına qoyulan tələblərin dəyişməsi, kommunal xidmətlərə dair texniki şərtlərin rüsumlarının çoxluğudur. Eyni zamanda, Bakıda torpaq sahələrinin azalması və pilot layihələrin davam etdirilməməsi də mənzillərin dəyərini artırır.